Kufiri i botes
Kufiri i botës është deri tek ti
Nëpër vijat e qiellit,
Nëpër imazhet e reve,
Në pafundësinë e oqeaneve,
Në udhën e bardhë të mallit
Është kufiri i botës që më sjell tek ti.
Nëpër fjalët e dashurisë,
Nëpër krahë avionësh,
Në aeroporte të braktisura,
Në fluturime të vetmuara,
Në trishtimin e ndarjeve
Është kufiri i botës që më ndan nga ti.
Le te hapet
Le të hapet, pra, qielli!
Këtë verë pres të hapet qielli,
Të bien muret e të shkëlqejë dielli,
Të mbahet mend se me ç’padurim e presim
Çastin kur buzët tona të shkrihen
Ne një melodi të ëmbël pasioni…
Të mbahet mend përqafimi
Dhe gëzimi si prej fëmije i zemrës në kraharor.
Më duhet të vij tek ti,
Më thërret malli,
E ndiej se duhet,
Ndaj pres të hapet qielli, të bien muret.
Me një puthje malli dua të vij tek ti këtë verë,
Le të hapet, pra, qielli e ta mundim së bashku pritjen.
Patjetër, këtë verë…
Pres të dalë dielli…
Në kujtim të saj
Në kujtim të saj
Do të vë në tryezë trëndafila të kuq
Për ta ngjallur sërish imazhin e saj.
Në kujtim të saj
Do të shoh ëndrrën më të bukur si në legjenda,
Ta ndiej shpirtin e saj të ngurtësuar në jehona mitesh.
Në kujtim të saj
Do të shkruaj data
Në brigje të largëta, në blu të frikshme.
Në kujtim të saj
Do të pushoj së shkruari, do ta përpij errësirën,
Do të hesht e do të shkrihem në vaj të përjetshëm.
Pogradeci
Dy mjellma mbi pasqyrën e liqenit
Dhe malet përreth përthyhen në syprinën e tij,
Shihen në të edhe dielli, edhe vete liqeni,
Dhe qielli i patrazuar e i paqtë,
Dhe jeta e njerëzit,
Dhe një varkë e braktisur në breg,
Dhe një tjetër tutje, larg nga bregu,
Dhe Lasgushi me Kutelin,
Dhe vjeshta dhe dimri,
Dhe vera me njerëz plot,
Dhe mbrëmja…
Dhe sot
Në këtë pasqyrë të madhe
Ka vend për të gjithë…
Në këtë pasqyrë
Pogradeci nuk fshihet dot…
Rruge
Ka rrugë në qiell,
Ka rrugë në det,
Ka rrugë në rrugë,
Ka rrugë në zemër,
Ka rrugë në shpirt.
Ka rrugë drejt jetës,
Ka rrugë drejt vdekjes,
Ka rrugë për te dashuria,
Ka rrugë për te ndarja.
Ka rrugë për tek ti,
Ka rrugë për tek unë.
Ka rrugë, ka rrugë pafund,
Rrugë që të çojnë te kjo botë
E përgjithmonë në botën tjetër.
