- NË MUAJIN MARS
Në Mars,
vështroni si ç’bëhet dimri,
si bymehet brumi i tokës,
nga Venusi,
si ënjten sythet,
në çdo frymëmarrje,
si ndizet syri,
nga ylber zambakësh.
Në Mars,
vështroni si zhvishet dimri,
si heq pallton,
kapuçët, dorashkat,
si hijeshohet Toka,
me bluza petalesh,
si harbohet e kuqja,
dashuri tulipanësh,
kordelja e verdhë,
xhelozi dafodilesh,
vështroni si në altarin qiellor,
pranvera rikrijon kurme yjesh.
Në Mars,
ndjeni tek njerëzit,
si ç’bëhet, e ri-bëhet shpirti,
në katharsis,
si plasariten gonxhe-zemrat,
si buisin lulet,
dashuritë njerëzore,
tek ndjellin shpresën,
me aromë pranverore,
e shkundin shpirtin,
nga përjetimet e petkave të dimrit.
Ndjeni si troket në zemër
haiku,
kumt i epërm i bilbilit.
Në Mars,
pranvera, nimfë magjistare,
shpirtrat pendestarë i shndrron
në apoteozë ringjalljeje!
Mars 2020
