Aleanca KuqeZi përmes një deklarate për shtyp ka njoftuar aderimin e Shpëtim Karamuçës në radhët e AK si Sekretar për Çështjen e ish- të Burgosurve Politikë.Sekretari Politik i Aleancës KuqeZi, Eduard Kaca, në deklaratën për shtyp, dhënë në ambientet e Aleancës KuqeZi, deklaroi se Karamuça, një figurë e njohur në spektrin e ish- të burgosurve dhe përndjekurve politikë, është votuar me unanimitet nga Sekretariati i Aleancës Kuq e Zi për të qenë pjesë e strukturave vendimmarrëse të kuq e zinjve.

“Aleanca KuqeZi e ndërmerr këtë hap me z.Karamuça, i cili do të jetë në kryesinë e kuqezinjve për dy arsye të një rëndësie të veçantë: së pari, Aleanca KuqeZi do të krijojë një departament ekskluziv në strukturën e saj për çështjen dhe problematikën e ish- të përndjekurve dhe burgosurve politikë me qëllim dhënien e zgjidhjes përfundimtare të dëmshpërblimit të kësaj shtrese të vuajtur të shoqërisë sonë ashtu sikundër kryetari i AK, Kreshnik Spahiu ka prezantuar dhe formën në të cilën do të kryhet kompensimi ish të përndjekurve politikë të sistemit diktatorial, por pa diskutim dhe të sistemit pseudo-demokrat të shtetasit Sali Berisha”,” tha Kaca.

“Së dyti, bashkimi i z.Karamuça me kuqezinjtë tregon qartë se AK është duke krijuar një koalicion të gjerë në radhët e saj. “Koalicioni i shqiptarëve kundër tradhtarëve” është në rrugën e mbarë të formimit të tij në çdo cep të Shqipërisë me çdo shqiptar që beson se Shqipëria bëhet, por jo me këtë klasë politike të degjeneruar”, vijoi Kaca.
“Aleanca KuqeZi i bën thirrje të gjithë ish të burgosurve, minatorëve, fermerëve, mësuesve dhe çdo shqiptari të indinjuar të bëhet pjesë e koalicionit të shqiptarëve për largimin e shtetasit Sali Berisha nga pushteti i grabitur me vota të vjedhura, të bashkohen me kuqezinjtë si e vetmja mundësi për të bërë Shqipërinë,” thuhet në deklaratën e AK.